yoozone parsi bakhtiyari

یوزونِ پارسیْ بختیاری

مواویوزوم که نوموم بختیاره

سِجلدُم کِلْ کوهِ آنزان دیاره

لَقَو دارُم زِ ایلِ بختیاری

زِ شیرونِ دلیرِ هفت و چاری

مو هومدای گَپِ ایرون زمینُم

مُسلمونُم ،علی(ع) مولایِ دینُم

غُرورُم زردکوه و آسِماری

ندارُم بهتر از یو افتخاری

مو گَو سردار اسد سردارِ جنگُم

زِ اوّل زادهٔ اسب و تُفنگُم

کوچیر بیدُم تُفَنگ دادِن وِه دَسُم

وَه پاسِ حُرمَتِش ، عهدی مو بَسُم

وِه مو گُدِن که دِشمِن هر زمونه

اِوید و حمله کِرد وِ ایل و حونه

نَزَن وا تیرِ و تَش پُشتِ گوونِه

بِگِر رِی سینه نامردِن نِشونه

کسی زَهلهٔ جنگ وا مو نداره

گَپوم مو ، سِن و سالُم شیش هزاره

اَیَر دِشمِن بِنِه پاشِه وِه ایرون

وولاتِش ایکُنُم وا خاک یِکسون .

شاعر معاصر : داوود جمشیدیان

پاییز ۱۳۹۶